Një i ri nga Dibra është vënë në pranga tek ura e Drinit të Zi, pasi po transportonte dy emigrantë drejt Kosovës.
Arrestimi është bërë nga Policia e Kukësit.
Njoftimi i Policisë së Kukësit:
Goditet 1 tjetër rast i tentativës për dhënie ndihmë për kalim të paligjshëm të kufirit.
Vihet në pranga 1 shtetas.
Strukturat e DVP Kukës, në bashkëpunim me DVKM Kukës, në vijim të operacionit policor të koduar ‘Morina’, si dhe në zbatim të detyrave të përcaktuara në planin e masave për parandalimin dhe goditjen e aktivitetit të paligjshëm të dhënies ndihmë për kalim të paligjshëm të kufijve dhe tranzitimin e tyre në territorin shqiptar, me destinacion vendet e BE-së, goditën një tjetër rast të kësaj veprimtarie kriminale. Si rezultat u arrestua në flagrancë shtetasi:
-G. L., 33 vjeç, banues në Dibër.
Ky shtetas u arrestua në flagrancë, pasi është kapur nga shërbimet e Policisë, në vendin e quajtur ‘Ura e Drinit të Zi’, duke transportuar me automjetin tip ‘Volkswagen’, 2 emigrantë të paligjshëm, për t’i kaluar në mënyrë të paligjshme nëpërmjet kufirit të gjelbër, drejt Kosovës, kundrejt fitimit.
Materialet hetimore do t’i kalojnë Prokurorisë pranë Gjykatës së Shkallës së Parë Kukës, për veprime të mëtejshme.