Koronavirusi është një problem i pashmangshëm edhe për botën e futbollit.
Skuadrat tashmë kanë nisur grumbullimet në prag të sezonit të ri dhe nga analizat e kryera tregohet se shumë futbollistë nuk kanë mundur t’i shpëtojnë infektimit nga Covid-19.
Kështu te Kukësi nuk duan t’i lënë asgjë rastësi. Lojtarët dhe stafi verilindorë u janë nënshtruar ditën e diel testeve për Covid-19 dhe të hënën kanë marrë përgjigjet.
Klubi në faqen zyrtare ka bërë me dije se të gjitha analizat kanë rezultuar negative e skuadra do të qëndrojë e grumbulluar në Elbasan.
Ditën e enjte, Kukësi do të luajë ndeshjen e Europa League ndaj Slavia Sofias, ndërsa do të kryejnë sërish tampon ditën e martë.
Një lajm i mirë për trajneri Gega pasi do të ketë kështu të gjithë grupin të gatshëm për këtë ndeshje të rëndësishme që do të luhet në ‘Air Albania’.
Ndërkohë drejtori sportiv i Kukësit, Nderim Nexhipi ne nje interviste per shtypin shqiptar sportive zbulon se bullgarët nuk do të testohen për Covid-19 kur të zbarkojnë në vendin tonë. ‘Në Shqipëri nuk ka nevojë kush për testime, kur futet këtu. Ashtu do të jetë edhe për ndeshjen kundër Slavia.
Ata vijnë me rezultatet e testeve që bëjnë atje. Besoj se nuk do të testohen në vendin tonë sërish’, u shpreh drejtori sportiv i Kukësit.