Emisioni “Analizë Superiore” nën drejtimin e Sokol Xhihanit dhe Fation Bardhit, videoanalistit të kombëtares U19, që transmetohet çdo javë në Supersport, u ndal ditën e sotme edhe te zotërimi i topit të topat e humbur.
Në qarkullim topi kryeson Kukësi. Ish-trajneri Diego Longo kishte një nga parimet e tij bazë mbajtjen e topit dhe skuadra verilindore, që e mbylli sezonin në vend të katërt, në totalin e 36 ndeshjeve e qarkulloi dendur topin në masën 59.2%.
Më pas dy skuadrat kryeqytetase, Partizani dhe Dinamo me nga 54.4% dhe 52.2%, statistikë që u shërbeu “Demave” të Mehmetit për të zënë vendin e tretë dhe aspak “Bluve”, që i befasuan të gjithë duke rënë në Kategorinë e Parë.
Më pas Laçi e Vllaznia, teksa skuadra me përqindjen më të ulët të mbajtjes së topit në sezonin 2021/2022 në Superiore është Kastrioti (42.7%). Po numri mesatar i topave të humbur gjatë një ndeshje?
Vendin e parë e mban Vllaznia me mbi 102 topa të humbur. Kuqeblutë ndiqen nga Laçi e Teuta, teksa shumë mirë në këtë aspekt, duke shfaqur më shumë saktësi në pasime, janë Kukësi dhe Skënderbeu, me 88.43 dhe 89.9 topa të humbur për ndeshje.