Gjykata e Posaçme çeli shqyrtimin gjyqësor ndaj ish-kryebashkiakut të Kukësit, Safet Gjici.
Në seancën e parë, të pandehurit konfirmuan qëndrimin e tyre për gjykim të shkurtuar, ndërsa SPAK pretendoi se filmimi i video-skandalit në Bashkinë Kukës të jetë bërë me vullnet të plotë nga Alma Kaçi.
Sipas SPAK, nga provat e administruara, ka rezultuar se pas favorit seksual të marrë nga Gjici, mes tij dhe Kaçit është bërë një bisedë ku kryebashkiaku e drejton Kaçin për tek Granit Gjana për të folur mbi tenderin për strehimin e qenve endacakë.
Në banesën e Kaçit është gjetur një USB, që përmbante filmimin bruto të aktit seksual në zyrën e Bashkisë.
Kaçi ka dhënë disa versione gjatë marrjeve në pyetje. Fillimisht, ajo ka pretenduar se filmimin e ka bërë në kuadër të emisionit investigativ ‘Fiks Fare’, pasi, sipas saj, ishte gazetare e padeklaruar e këtij programi.
Sipas SPAK, në telefonin e Kaçit, iu gjetën biseda mes saj dhe gazetarëve të emisionit investigativ, ku Kaçi fliste për këtë filmim, por nuk është provuar një marrëveshje mes tyre.
Në një tjeter deklarim, Kaçi ka pretenduar se për filmimin ka pasur dijeni edhe ish-kreu i Qarkut Kukës, Abedin Oruçi, që, sipas saj, ia kishte marrë me forcë USB-në.
Por, ky pretendim i saj nuk ka gjetur mbështetje në prova të tjera.